
హైదరాబాద్, కాంగ్రెస్ ఎన్నికల మేనిఫెస్టో ‘అభయహస్తం’లో ఇచ్చిన హామీల అమలుపై బీఆర్ఎస్ వర్కింగ్ ప్రెసిడెంట్ కేటీఆర్ తీవ్ర విమర్శలు చేశారు. తెలంగాణ పర్యటనకు వచ్చిన కాంగ్రెస్ అగ్రనేత రాహుల్ గాంధీని ఉద్దేశించి పలు ప్రశ్నలు సంధించారు. రాష్ట్ర ఖజానా ఖర్చుతో హైదరాబాద్లో పర్యటిస్తున్న రాహుల్.. కాంగ్రెస్ ప్రకటించిన 420 హామీలు, 13 డిక్లరేషన్లు, 6 గ్యారెంటీల అమలుపై సమాధానం చెప్పాలని డిమాండ్ చేశారు. ఎన్నికల సమయంలో ఇచ్చిన హామీలకు, ప్రస్తుతం అమలవుతున్న పథకాలకు పొంతన లేదని ఆరోపించారు. ఈ మేరకు కేటీఆర్ ‘ఎక్స్’ వేదికగా కాంగ్రెస్ ప్రభుత్వంపై విమర్శలు గుప్పించారు.
బీసీ డిక్లరేషన్లో భాగంగా వెనుకబడిన తరగతుల సంక్షేమం కోసం ఐదేళ్లలో రూ.లక్ష కోట్ల బడ్జెట్ కేటాయిస్తామని కాంగ్రెస్ హామీ ఇచ్చిందని కేటీఆర్ గుర్తుచేశారు. అయితే మూడేళ్లలో రూ.5 వేల కోట్ల లోపే కేటాయించారని ఆరోపించారు. విద్య, ఉద్యోగాలు, ప్రభుత్వ కాంట్రాక్టుల్లో బీసీలకు 42 శాతం వాటా కల్పిస్తామని ప్రకటించినప్పటికీ, ఇప్పటివరకు ఒక్క శాతం కూడా అమలు చేయలేదని విమర్శించారు.
ఎస్సీ, ఎస్టీ డిక్లరేషన్లో భాగంగా పేద ఎస్సీ, ఎస్టీ కుటుంబాలకు రూ.12 లక్షల ఆర్థిక సాయం అందించే ‘అంబేడ్కర్ అభయహస్తం’ పథకాన్ని ప్రకటించారని కేటీఆర్ పేర్కొన్నారు. అలాగే ప్రభుత్వ కాంట్రాక్టుల్లో ఎస్సీ, ఎస్టీలకు 31 శాతం వాటా కల్పిస్తామని హామీ ఇచ్చారని గుర్తుచేశారు. అయితే ఈ రెండు హామీల అమలులోనూ ఎలాంటి పురోగతి కనిపించడం లేదని ఆరోపించారు.
యూత్ డిక్లరేషన్లో భాగంగా 365 రోజుల్లో రెండు లక్షల ఉద్యోగాలు భర్తీ చేస్తామని, ‘రాజీవ్ యువ వికాసం’ పథకాన్ని అమలు చేస్తామని కాంగ్రెస్ ప్రకటించిందని కేటీఆర్ తెలిపారు. కానీ ఇప్పటివరకు 10 వేల ఉద్యోగాలు మాత్రమే ఇచ్చారని విమర్శించారు. రాజీవ్ యువ వికాసం పథకం ద్వారా కూడా యువతకు ఆశించిన ప్రయోజనం అందలేదన్నారు. విద్యార్థులకు రూ.5 లక్షల ‘విద్యా భరోసా కార్డు’ ఇస్తామని ఇచ్చిన హామీని సైతం నెరవేర్చలేదని ఆరోపించారు.
మైనారిటీ డిక్లరేషన్లో భాగంగా రూ.4 వేల కోట్ల బడ్జెట్ కేటాయిస్తామని కాంగ్రెస్ హామీ ఇచ్చిందని కేటీఆర్ గుర్తుచేశారు. అయితే ఇప్పటివరకు రూ.వెయ్యి కోట్ల లోపే కేటాయించారని విమర్శించారు. ఇలా అన్ని వర్గాలకు ఇచ్చిన హామీల అమలులో కాంగ్రెస్ ప్రభుత్వం విఫలమైందని ఆరోపించారు.
‘అబద్ధాలు.. పచ్చి అబద్ధాలు.. వాటన్నింటికీ మించి కాంగ్రెస్ ఎన్నికల మేనిఫెస్టో అభయహస్తం’ అంటూ కేటీఆర్ తన పోస్టులో ఘాటుగా వ్యాఖ్యానించారు. తెలంగాణ ప్రజలకు కాంగ్రెస్ చేసిన ద్రోహం అంతులేనిదని విమర్శించారు. ఎన్నికల సమయంలో ప్రజలకు ఇచ్చిన హామీల అమలుపై రాహుల్ గాంధీ సమాధానం చెప్పాలని డిమాండ్ చేశారు.
