
భారత క్రికెట్లో ప్రాంతీయ ప్రాధాన్యత, హైదరాబాద్ ఆటగాళ్లకు దక్కుతున్న అవకాశాలపై మాజీ క్రికెటర్ అంబటి రాయుడు మరోసారి తన అభిప్రాయాలను వెల్లడించారు. తాజాగా ఓ పాడ్కాస్ట్లో మాట్లాడిన ఆయన.. యువ క్రికెటర్ తిలక్ వర్మ ప్రతిభను ప్రశంసిస్తూనే, ముంబై ఆటగాళ్లకు లభించే ప్రాధాన్యతతో హైదరాబాద్ ఆటగాళ్ల పరిస్థితిని పోల్చారు.
తిలక్ వర్మను కేవలం టీ20 ఫార్మాట్కే పరిమితం చేయకూడదని రాయుడు అభిప్రాయపడ్డారు. టెస్టులు, వన్డేలు, టీ20లు.. మూడు ఫార్మాట్లలోనూ రాణించగల సామర్థ్యం అతనికి ఉందని పేర్కొన్నారు. రెడ్ బాల్, వైట్ బాల్ క్రికెట్లోనూ తన బ్యాటింగ్తో ఆకట్టుకుంటున్న తిలక్కు అన్ని ఫార్మాట్లలోనూ అవకాశాలు కల్పించాలని కోరారు.
ముంబై ఆటగాడైతే పరిస్థితి మరోలా ఉండేదా?
తిలక్ వర్మకు అవకాశాలు ఇవ్వాలని తాను వ్యక్తిగతంగా సిఫార్సు చేయడం లేదని రాయుడు స్పష్టం చేశారు. ఇదే స్థాయి ప్రదర్శనను ముంబైకి చెందిన ఆటగాడు చేసి ఉంటే.. అతడిని ఒక్క ఫార్మాట్కే పరిమితం చేసేవారా? అన్ని ఫార్మాట్లలోనూ ఆడించేందుకు ప్రాధాన్యత ఇచ్చేవారని వ్యాఖ్యానించారు.
హైదరాబాద్ క్రికెటర్ల విషయంలో మాత్రం తరచూ పరిమితులు విధిస్తున్నారని ఆయన అసంతృప్తి వ్యక్తం చేశారు. గతంలో వీవీఎస్ లక్ష్మణ్ను కూడా ఒకే ఫార్మాట్కు పరిమితం చేశారని గుర్తుచేశారు. తన విషయంలోనూ ఇలాంటి పరిస్థితులు ఎదురయ్యాయని పేర్కొంటూ.. తిలక్ వర్మకు అలాంటి అనుభవం ఎదురుకాకూడదని అభిప్రాయపడ్డారు.
ప్రజ్ఞాన్ ఓజాకు రాయుడు విజ్ఞప్తి
ప్రస్తుత సెలక్షన్ కమిటీలో హైదరాబాద్కు చెందిన మాజీ క్రికెటర్ ప్రజ్ఞాన్ ఓజా ఉండటాన్ని రాయుడు ప్రస్తావించారు. తిలక్ వర్మకు అన్ని ఫార్మాట్లలో అవకాశాలు కల్పించేలా ఓజాకు విజ్ఞప్తి చేయాలని సరదాగా వ్యాఖ్యానించారు.
ఓజా పదవిలో ఉన్నప్పుడే తిలక్కు తగిన అవకాశాలు కల్పించాలని కోరాలని, తర్వాత పరిస్థితులు మారితే ఇలాంటి నిర్ణయాలు తీసుకోవడం కష్టమవుతుందని తనదైన శైలిలో చురకలు వేశారు. రాయుడు చేసిన ఈ వ్యాఖ్యలు ప్రస్తుతం క్రికెట్ అభిమానుల్లో చర్చకు దారితీస్తున్నాయి.
